ما رأيكم دام فضلكم في الزبائن اللي نهفه عالاخر ..؟؟ بيشخصوا الحاله المرضيه لحالهم وبيقرروا شو الدواء وحتى العيار برضه لحالهم !!؟؟زي اللي اتصلت بالتلفون واقعه على حوضها وخابطه رأسها !! (ومش عارفه ليش انا اجاني وحي انه هالوقعه حصلت معها في حوض الحمام البانيو!).. المريضه شخصت حالتها بما لا يدعو للشك أنها قد أصيبت بالديسك! وبأسلوب جازم لا نقاش فيه ومن غير صوره أشعه قطعت الشك باليقين وضربت بنصيحتي( مراجعه طبيب وتصوير اشعه) بعرض الحائط!! وبصفتها طبيبه بالإيحاء ( وهذا تخصص نفتخر بوجوده بكثره في الاردن)!! قررت ان الدواء الذي نصحتها فيه جارتها ام فلان أثناء قعده احتساء فنجان القهوه الصباحي هو الدواء الناجع بنسبه ٨٠بالمائه (حسب تقدير الجاره)!!..يا عمي ! شعب مثقف متعلم ! يخزي العين حوله وحواليه! انا مش عارفه ليش كليات الطب والصيدله مفتوحه؟؟!! قال صيدليات قال!! نسكر ونروح على بيوتنا احسن!!هاها( من يوميات صيدلانيه)..

خمس سنوات في كليه الصيدله وكنت مركزه بالدراسة والله على ما اقول شهيد.. وتابعت بعد التخرج مقالات ومحاضرات ودورات (التعليم الصيدلاني المستمر).. بس ما لقيت مرض اسمه (لفحه هوا)!!! ولا حد جاب سيرته .. مع انه في ناس عندهم هو سبب لكل الأمراض! ..إذا مغص ، لفحه هوا.. اذا شد عضلي،لفحه هوا..وجع راس، لفحه هوا..ألم في الخصر،لفحه هوا..عين بترف ، لفحه هوا!!! ولا في اي مرض بالجامعه ما طلع لي هذا التشخيص! ومع هيك هذيك اليوم اجاني زبون ضارب كل شي معه ! ما في اشي إلا بيوجعه! عقدني وما طلعت معه غير بجمله واحده لقيت أنها هي الجواب النهائي: يمكن تكون ماخد لفحه هوا !!!...(من يوميات صيدلانيه)..

طيور وعيونها ملتهبه مر علينا.. قطط وعليها براغيث عالجنا..كلاب لوزها مصابه شفنا.. بس ما مر علينا نعالج البقر بصراحه!!! البقرات المريضة مش بالبلد .. في دوله عربيه ومصابه بتشقق لسان وأقدام وحراره وقعد يشرح لي اللي طالب الدواء وانا مش مصدقه أذني !! طلع المرض حمى قلاعيه وبدهم لقاح إبر وقصص!! انا حزنت عالبقرات وقلت له يا أخي انت لازمك دكتور بيطري ! ودليته على دكتور كانوا أولادي بياخذوا له الحيوانات بالمنطقة..علاقتي مع الحيوانات الأليفة هو حب من على بعد ! يعني ما أدخلهم البيت .. ممكن البلكونه او الحديقه.. جربنا كل شي طبعا.. اكتر حيوان زعلت عليه كان أرنب واقترحت عالاولاد نسميه سفروت! مات موته ما تتمناها لحدا! تسمم بعيدن عنكم .. هرب تحت تنك سولار وباءت كل محاولات اخراجه بالفشل بالاخر لحس شويه سولار وتسمم وراح فيها!! والأرنب التاني لا انسى ما حصل له.. مسكه ابن الجيران وضرب راسه بالحيط عمله ارتجاج بالمخ وبعدين جاب بربيج ماء دخله في فم الأرنب !!! شو هالتعذيب ! طبعا انا نزلت فارعه دارعه على صياح أولادي والشرر يتطاير من عيني .طبعا الولد تبهدل وتم استدعاء امه اللي ما عرفت تربي ابنها!! ما انسى منظر ابني وهو مغطي الأرنب اللي عم يرجف بالحرام بعد الالتهاب الرئوي اللي أصيب فيه.. رغم المضاد الحيوي اللي سارعت الى إعطائه الا انه فارق الحياه..وبعدين ليش في أجرام وعنف! اذا الناس ما ربوا أولادهم على الرفق بالحيوان رح يطلع هذا الجيل يرفق بالبني ادم ؟؟؟( من يوميات صيدلانيه)..

سؤال يحيرني وما زلت حتى هذه اللحظه مش لاقيه له جواب.. لما المريض يجي الصيدليه ومعاه وصفه فيها ٣أدويه مثلا .. يطلع واحد منهم مش متوفر وغالباً يكون مقطوع..يقول معلش انا بدي اياهم كلهم من نفس الصيدليه!!! ويطلع ما ياخد إشي ويتركني مزبهله وأبحلق فيه وهو يختفي في الأفق!! لو مريض تأمين بيمشي الحال ومفهومه انه الادويه كلها من نفس الصيدليه ولو بده فاتوره مثلا ممكن اعذره .. اما لما لا هيك ولا هيك يبقى ( لماذا)؟؟؟ مش قادره ابلعها.. ما بيفكر انو ممكن يلاقي الدواء المنشود وما يلاقي دواء من الادويه اللي كان لاقيها في الصيدليه اللي قبلها ! بيخلوني أشك بطريقه تفكيري! يعني انا مثلا اللي الاقيه اشتريه واروح أدور على اللي ما كان موجود في مكان آخر !! منطق ده ولا مش منطق ؟؟؟ ( من يوميات صيدلانيه)..

نظريه من نظرياتي المضحكة.. لما نقعد ساعه زمن مثلا ما يدخل علينا حد عالصيدليه.. وفجأة يهلوا الزبائن مع بعض..! اكتر من واحد سوا..يصيروا الموظفين يقولوا لو كل واحد يجي لوحده نروق عليه بدل ما ننعجق لما كلهم ييجوا في نفس الوقت!!... انا اقول لهم بالعكس هيك احسن.. لو كل واحد اجى لوحده كان صار يقول : شو هالصيدليه اللي بتحزن ! ما بيدخل عندهم حدا ! ما صدقوا ودخلت!!.. أما لما ييجي ويلاقي في غيره بيجي عالصيدليه وعجقه.. بيصير نفسيا يفكر:.. آووه شكلها صيدليه شغاله والناس بتيجي عليها.. اكيد الادويه دائماً متوفرة واللي فيها جماعه كويسين!! هاها صيت غنى ولا صيت فقر..!..يا عم أهلا وسهلا فيهم فرادى وجماعات! ( من يوميات صيدلانيه)..

زميل صيدلي متقاعد، ٢٥سنه مغترب ورجع عالبلد..لما يدخل الصيدليه له معامله خاصه جداً..بصراحه أتعاطف معه، بيحن لأيام كان فيها مسؤول عن صيدليه اربع أضعاف حجم صيدليتي المتواضعة..وأنا أحب اني أأهل وأسهل فيه وأطول بالي عليه وهو يدردش عن ماضيه التليد في صيدليته العتيده..تعرفت عليه من حوالي عشر سنين، بينزل من سياره للمعاقين وبيمشي عالعكازه..حادث سير.. كان مع الحجه بالسياره واقفين عالاشاره..واحد مسرع بسيارته مع خطيبته.. عال١٨٠!..اصطدم فيهم! الحجه ارتمت بره السياره وهو خبط بعامود الكهرباء! ساقه أصيبت و٢٠ألف دينار فاتوره المستشفى دفعها اللي اصطدم فيه ( اللي ما صار فيه اشي)! تنازلوا عن حقوقهم..احرجوهم الجماعه..!! هو ما بيشكي بس زعلان عالحجه لانها مقعده بالتخت!! وبيحمد الله على كل حال وابتسامته لا تفارقه أبدا ..هذول الناس لو عندي سجاد احمر كان فرشته لهم لما يدخلوا عندي!!! السؤال الذي يطرح نفسه: فكركم انا عم أتعاطف معه لانه أ) زميل صيدلي.ب)ختيار جار عليه الزمن. ج)قلبي رقيق. د)جميع ما ذكر؟؟؟؟ من يوميات صيدلانيه).

طلع عندي شويه ضغط على كولسترول عالي على قولون عصبي ! هذا كان جواب أحد مندوبي الادويه على سؤال: كيف حالك؟؟؟..قلت له : عاااادي جداً.. مش انت مندوب وبتطارد طول النهار وعندك شيكات لازم تحصلها ورقم مبيعات لازم توصل له!! وفي البيت أفواه وأرانب وطلبات وإيجار وأقساط مدارس وبنزين سياره!! أهلا بك على ارض الواقع!..قال لي: تخيلي يا ام حكم ، ابنتي اللي في الصف الأول الابتدائي يعني عمرها ست سنوات شو بتقول لي يوم الجمعه؟ بابا .. انت بتشتغل طول الأسبوع ويوم الجمعه هذا لنا ! انا نفسيتي تعبانه وبدك تاخدني مشوار وتغديني بره !!..طبعاً هو ما قدر يقاوم! كله ولا نفسيه ابنته! ومع انه كان ناوي يشتغل شوي .. قال لهم ( للعيله كلها)يلله قوموا إلبسوا خلينا نطش ! ولا حدا حوش!!!... ( من يوميات صيدلانيه)..

نظراً لضيق الوقت، قمت بتقديم واجب العزاء لأحد الأصدقاء بإتصال هاتفي.. كانت المتوفاة الله يرحمها ويرحمنا أجمعين عمته..هاجرت من فلسطين الى لبنان من زمان وتزوجت رجل من الضيعه.. لم يكتب لهما رزقه من الأولاد .. ولكن الله رزقهما محبه كل الضيعه.. بعد وفاه الختيار بقيت الختياره لوحدها.. أهلها في عمان عرضوا عليها تيجي تسكن عندهم .. بس لا هي كان بدها ولا أهل الضيعه رضيوا .. في عيله سكنتها معاهم وأعطوها غرفه شباكها عالشارع.. لما راح صاحبنا يزورها.. كل شوي حد يدق عالشباك ( بدك شي يا حجه) ( هيدا ابن خيك)؟؟( اسم الله حوله وحواليه).. كان بيطلع لها من الدوله ٣٥دينار وأهلها في عمان ما قصروا معها .. آخر أيامها كتير تأزمت معها بالمرض..الله يبارك لهالعيله ويجازيهم كل خير .. إحنا أهل المدينه الجار ما بيعرف مين جاره.. لا انسى قصه ناس فكروا جيرانهم عم بينقلوا من الشقه اللي جنبهم وحتى ساعدوهم بالنقل .. تاني يوم اجى صاحب الشقه الحقيقي ولقى عفش البيت كله مسروق!! وفي وضح النهار ! عينك عينك! هذه هي المدنيه .. أكيد الحق علينا .. ( من يوميات صيدلانيه)

أحكي لكم عن اول حادثه محاوله سرقه من عشرين سنه..كان ياما كان في قديم الزمان .. صيدلانيه بتكش دبان !! اللي هي انا اول ما فتحت الصيدليه! دخل شاب بده شاش معقم .. لفيت حالي عالخزانه اللي خلفي عشان اجيب الشاش .. يا دوبك انا درت وجهي ولا انا اسمع صوت خزانه بتفتح !! ناولت الشاب الشاش وعيني عالخزانه اللي وراه..لمحه واحده كانت كافيه عشان اعرف انه سرق زجاجه عطر ! كانت العطور لانها قليله مصفوفه جنب بعضها ! ثمن العطر الواحد كان قد ما أبيع طول النهار هديك الأيام !! أممم ..هو وانا بس في الصيدليه! كان عمري وقتها بأواخر العشرينات ولسه دمي حامي وإنفعاليه!(على اساس انا هلق ركزت وعقلت!!هاها) وما حسيت حالي إلا رايحه على باب الصيدليه وسكرته!! قال يعني حبسته جوا الصيدليه معي!! وقلت له: العطر اللي سرقته بتطلعه هلق والا بجيب لك الشرطه!!( ما حدا يحكي لي اشي! زوجي وأهلي ما قصروا فيي!) هو كمان كان بالعشرينات وأطول مني وكان ممكن وممكن وممكن ! بس الله ستر.. لما شاف حاله انكشف ورأى الشرر يتطاير من عيني!! هاها قال اختصر احسن ! واعطيها الغنيمة! دخل يده في الكيس اللي كان حامله وطلع زجاجه العطر اللي غاليه على قلبي! بيع زي الناس لسه ما ابتدينا نبيع ! كمان انسرق!؟؟ أهو ده اللي مش ممكن أبدا!! أخذت العطر منه بإيد وفتحت الباب باليد الثانيه..وفر شارداً هارباً على أنغام سيمفونيه البهدله اللي أسعفني لساني بها في ذلك الوقت!! طولت عليكم؟؟ بس في تكمله صغيره للقصه! وهي ان أخوي أشرف صف سيارته لحظه ما هرب الحرامي ! كان أيامها بالجامعه .. وبذكائه الخارق فهم الطبخه! لحق الحرامي ! أمسكه ! تشتشه! ورجع !.. ومن غي حكي كتير !!! تعلمت اشياء كتيره!( من يوميات صيدلانيه).

من اهم الدروس اللي علمتني إياها الصيدليه..(وهي اهم من اللي تعلمته بسنين الجامعه كلها!!)..إني مش بس احترم المريض كإنسان وانما أحترم آلامه أيضاً..( عرج الجمل من شفته)هي مقوله صحيحه مع أننا منضحك عليها..والحقيقة الجمل مش بس رح يعرج من شفته وانما كمان مش رح يعرف يأكل لقمه ورأسه رح يصير يوجعه ومش رح تشوف عينه النوووووم!! أقل ألم في الجسم لو حتى مسمار لحمي في اسفل قدمك، أو شوكه غزت في إيدك ،أو غبره دخلت في عينك أو باب سكر على إصبعك ! خلص رح تقفل ! وتبطل تستقبل أو ترسل!!! عشان هيك الواحد ما يستخف بألم غيره ..مضبوط في إشي أهون من إشي.. بس الحكي مش مثل الشوف!!..زمان بالمدرسة علمونا الحديث الشريف ( مثل المؤمنين في توادهم وتعاطفهم وتراحمهم كمثل الجسد الواحد....)ضلينا متذكرين المقطع التاني بس اللي هو أهم واللي هو الهدف من الحديث ، المقطع الأول!! .. حفظونا اياه وطلعونا ( كل واحد حر في حاله )(أنا شو دخلني)..!ومفهوم الجسد الواحد قطعوه أجزاء !! وعشان هيك بطل جزء صالح .. زي قطع ال puzzle ..كل قطعه لحالها ما لها معنى ولا فائده..بس تركب في مكانها تتشكل الرسمة الكبيره ويطلع المعنى واضح !!( من يوميات صيدلانيه)..

أصبحنا واصبح الملك لله .. لسه وانا افتح باب الصيدليه ولا واحد من أصدقائي الختياريه( فوق السبعين)..داخل وراي .. أخذ دواء مع الشرح والاستفسار .. وكتبت له على ادويته كيف وليش وايمتى .. وبعدين صار يقول لي : معلش غلبتك يا ام حكم بس عشان انا لحالي بالبيت .. ابني ساكن قريب وبيطلطل علي ومرته منيحه .. والاولاد أصروا أتزوج بعد المرحومة.. لما وافقت يدوروا لي على عروس ... يعني كبيره شوي .. خمسه وأربعين لحد خمسين ( بلعتها وضليت ساكته!! ) . وانا علي الذهب والعرس والبيت والعفش.. !! عريس لقطه! بس يا ام حكم تعقدت! اللي بدها اكتب البيت باسمها ! واللي بتسألني لك حصه مع اولادك بالمصنع!! وهيك داخلين على طمع ! اصلا ما رح الاقي مثل المرحومة.. بالآخر قلت للأولاد سيبوكم من هالسيره .. حزنت عليه صديقي!! عن جد صعب الرجل يعيش من غير ست..إنما ليش الست بيمشي حالها وهو لأ؟؟؟ هي ليش ما بتقول بدها حد يكمل معها مشوار حياتها بعد المرحوم ؟؟؟ ليه منحزن عليه وما منحزن عليها؟؟؟ هي كل القصه طبخ وتنظيف؟؟ وين راحت الموده والرحمه ؟؟ .. ( من يوميات صيدلانيه)..

مع الأيام ومن كتر التعامل والتواصل النوعي مع الناس بيصير عندك فكره كيف تتعامل مع كل شخص حسب ظروفه..احكي لكم عن نظريتي في التعامل مع الناس اللي بيوصلك خبر أنهم سيئين ! سواء بالتصرفات او الألفاظ او الأخلاق.. مثلا حد يقول لي : كيف فلان معك؟ اقول له: والله منيح ، ما شفت منه غير كل خير .. يقول لي : غريب بس هو كذا وكذا على شويه مزا ! .. اكتشفت انه الشخص اللي بيعمل اشي غلط او تصرفاته فظه مع الناس ، اذا انت احترمته وتعاملت معه بمنتهى الطبيعية وبتعمل حالك ما سمعت اشي عن سمعته السيئه ... بيصير معك ما في احسن منه !.. الانسان المنيح فيه جوانب متنحيه من الشر لا تظهر الا في حالات خاصه وقد لا تظهر أبداً..نفس الشي الانسان سيء التصرفات فيه جانب من الخير متنحي..!! قديش هذا الشخص بيكون فرحان فيك وانت تعامله زي اي إنسان محترم ..! بتطلع فيه كل الصفات الحسنه اللي هو كمااان نفسه تطلع ..بتكون سامع كل قصص الشر عنه بس عامل حالك ما عندك خبر ! بتعجبه صورته في نظرك ! وبيكون يحترمك بشكل بس لانك بتحترمه .. في حين باقي الناس بيحتقروه عشان عارفين أفعاله الشريرة واللي هو ما بيتوقف عنها معهم لانهم بيتوقعوها منه فهو ما بيخيب ظنهم وبيعطيهم إياها !! حد فاهم علي ؟؟ ولا هذه خزعبلائيات صيدلانيه !!! ..(من يوميات صيدلانيه)..

دار حديث هاتفي بيني وبين زميلة اشتغلت معي بالصيدليه من كم سنه وتزوجت وتركت الشغل وبقينا على اتصال..بعد التحيه والسلام وقديش إحنا مشتااااقين لبعض.. عبرت عن ندمها العميق بتركها الشغل وتفرغها لبيتها وأولادها وزوجها !!..طبعاً هي مش عارفه رأيي الصارم بهذا الموضوع !!وأعطيتها محاضره سريعه أرجو أنها ما تكون أنهت علاقتنا الى الأبد !( هي بآخر المكالمه أعطتني رقمها التاني! أظن هذه علامه ان الصداقه ما زالت قائمه!)..الفكره هي انه مضبوط الشهاده سلاح بس اذا ظروف حياتها ما اضطرتها لإشهار هذا السلاح وكان هناك ما هو اهم منه .. فلماذا تشهره؟؟غلط تقعد وتتستت في بيتها معززه مكرمه ! مش انا باشتغل واضرب واطرح ! بس مع الدور الأساسي اللي خلقت له المرأه وهو تنشئه جيل صالح وتحقيق الاستقرار العائلي!! لما كانوا أولادي صغار قعدت بالبيت خمس سنين ..كنت مفكره انه هذول اهم سنين الطفل اللي لازم امه تكون معه.. اتضح لاحقاً انه دور الأم لا ينتهي أبداً !! خروج الست للعمل سواء برغبتها او اضطرتها ظروف حياتها ، لا يقلل من مسؤوليتها داخل بيتها .. اللي عليك عليك!! إنما بتفهم الزوج وحسن إدارة الوقت تستطيع التوفيق بين كل واجباتها .. مشكله المجتمع هو إحساس ست البيت ( نفسها او هيك بيحسسها اللي حواليها)انه ينقصها شيء لانها ما بتشتغل !! وهذا خطأ خطأ خطأ!! يا ريت كل وحده تكون راضيه عن الواقع اللي هي فيه .. اللي بتشتغل وراضيه ، بتعطي! واللي قاعده بالبيت وراضيه ، ومقتنعه.. بتعطي!! .. خلونا نعطي !!(من يوميات صيدلانيه)..

أستمتع كثيراً عندما يحدث السيناريو التالي: ام حكم! انا قاعده مع قريبتي وهي قلقانه..لانه دوائها مقطوع ( وهو مصطلح السوق للدواء غير المتوفر لدى المستودع)ومش كاينه تلاقيه!..- شو هو ؟ ان شاء الله يكون موجود !.(.تقولي الزبونة اسمه..)..-حظك رائع ! باقي منه قطعتين!..- ياااااااي!(وهذه كنايه عن فرحتها التي بلغت الآفاق!)خللي لي اياهم يا ام حكم ! ما تعطيهم لحدا!! -خلص ولا يهمك ! هم نصيبك! حطيتهم على جنب وكتبت اسمك عليهم!..سيناريو مثل هيك يتكرر كثيراً لانه الادويه كل شوي صنف مقطوع! ..وما منلحق قصص! بس الحلو في الموضوع اني أكون بيضت وجه زبونتي قدام قريبتها .. وفشيت قلب هالمريضه .. واعطيتها شويه وقت على بال ما تشوف دكتورها ويرضى يعطيها البديل المتوفر..الله يعين الناس ..( من يوميات صيدلانيه)..

(إيمتى جبهتي بدها توصل الأرض وأسجد يا ام حكم !!)..هذه كانت امنيه مريضه عندي تعاني من الديسك ..لها باع طويل في الأعمال الخيريه .. ولا نزكي على الله أحداً..إبتلاها الله بالالام في الظهر وديسك بالعامود الفقري ..ومن عمليه لعمليه .. وضعها الآن جيد وبتروح وبتيجي .. عندها سائق وسياره تحت أمرها .. لكن منعها الطبيب من السجود في الصلاه والاكتفاء بالايمائه ( وهذا جائز شرعاً في حالتها لان ديننا يسر)..حدثتني أنها مره سحلت حالها عالارض عشان تحاول تسجد ولكن لا قدرت تسجد ولا قدرت تقوم ..وباءت محاولاتها بالفشل.. طلعت من الصيدليه والدمعه بترغرغ في عيونها.. وتركتني وانا افكر .. كم مره نسجد في اليوم ونقوم واحنا مش حاسيين انه حركه زي هيك هي امنيه عند الغير..!!الله لا يحرمنا بأي سبب من الأسباب من متعه السجود لوجهه الكريم...

ان شاء الله إني أكون خوفته هالمريض اللي مر علي اليوم!..اللي بيستهين بوضعه أوقات بياكلها على راسه!! مريض من دوله شقيقه.. .. ولسه الدنيا الصبح ومنقوووول يا الله .. عامل عمليه بالركبه والجرح مفتوح وملتهب وهو بكل بساطه بده شاش ويود عشان يغير عالجرح!! ياااا للهول! شو الواحد شايف شوفات !! مستحيل انسى هالانسانه العزيزه اللي عملت عمليه بركبتها من كم سنه والتهب الجرح ولهلق بالتخت.. ورغم وعي بناتها وبذلهم المستحيل إلا ان الخراج تفاقم ..تمت السيطره عليه ..لكن لسه عم بيعانوا من آثاره..الله يشفيها ويعافيها.. المهم انا قلت للمريض: لازم دكتورك هو اللي يشرف على عمليه تنظيف الجرح من قبل ممرض محترف ( مش اي واحد ، الموضوع مش بهالسهوله)لا يتصرف الا بموافقه الطبيب..روح عالطوارئ ولحق الموضوع قبل ان يتفاقم!! طبعاً انا رحمته ولم اقل له شو طبيعه التفاقم!! بيكفي اني شويه خوفته!! وهذا ما يسمى في علم النفس الحديث بالتخويف الإيجابي!! ويحل لكل صيدلي اللجوء اليه لما يشوف انه المريض يلقي بنفسهالى التهلكه والله من وراء القصد!(من يوميات صيدلانيه).

اكيد كل واحد حر بفلوسه !وهو مسؤول ورح يتحاسب كيف جابها ومن وين وعلى إيش صرفها..ولا أنسى النقاش الذي دار بين الصديقات منذ سنوات عن حد الإسراف ..كيف انه الموضوع نسبه وتناسب.. واحد عنده كم مليون دينار واشترى يخت بنص مليون مش مسرف.. وأما واحد معاشه مائه دينار واشترى قميص بعشرين دينار مثلا بيطلع مسرف! ومع هيك أجد صعوبه وانا أشاهد بأم عيني الطبقات المختلفه من المجتمع.. اليوم الصبح حالتين في منتهى التناقض! الحاله الاولى صبيه أخذت دواء لعضلاتها التي تؤلمها على اثر وقوعها من الموتوسيكل..والحمد لله كانت لابسه الخوذه..وما قالت لامها خوف تقلق عليها..كانت عم بتشوف واحد بدها تشتريه وحمدت الله اللي مش بس الله نجاها من الوقعه وانما نجاها من عمليه نصب ! كانت رح تشتري الموتوسيكل ب١٢ألف دينار (والشيك اللي من ابوها بالجيبه)!!بس بعد الفحص طلع مفرهل( يعني طلع مقلب)!وبده موتور جديد..طلعت وهي تكمل عمليه البحث .. شوي ودخلت الحاله الثانيه..عامل بناء مغترب مشحر معتر عنده حكه في كل جسمه.. لسه عم اقول له يمكن جرب ولازم ينظف ملابسه والفرشه ويهوي الغرفه..ولا هو بيقول لي صعب كتير يا دكتوره عشان انا في غرفه فيها عشر بني أدمين ساكنين تحت مستوى الأرض وبلا تهويه..!!سبحان الله.. لله في خلقه شؤون .. وحكمه الله في العطاء والمنع لا تدركها عقول البشر .. ومش مطلوب منا ندركها أصلاً. اعتقد ان المطلوب منا انه نرضى فيها .. نرضى فيما قسم الله لنا .. إن كثير نؤدي حقه .. وإن قليل نقبل به دون اعتراض.. ولله الحمد .( من يوميات صيدلانيه).

اليوم كالعادة ، كتير اشياء صارت تستحق الذكر .. بس أهم حدث كان اني شفت أبوك ياRania Hammad.!! صار لي مده ما شفته.. وكل قبيله العطاري اللي بالصويفيه بيمروا عالصيدليه وأضل أسأل عليه.. بيقولوا لي تعبان شوي ومش عم بيطلع بره البيت كتير..اليوم مر علينا عمك وقال لي انه أبو علي شخصيا معاه بالسياره !! فلم أتمالك نفسي وطلعت اسلم عليه !! ما شاء الله صحته تمام ووجهه مليئ بالحيوية ..تزينه ضحكته ..وخدوده تفاح احمر كالعاده! .. أخ كبير وعزيز عالكل ..سررت كثيرا برؤيته .. الله يديم عليه الصحه والعافيه .. ( من يوميات صيدلانيه)..

عندي زبون أقدر زيارته للصيدليه كتير.. كان ساكن بعمان بس رحل على بيت لحم عشان ما تروح عليه الهويه..كل ما ييجي عمان إلا يمر يسلم ويشتري اللي فيه النصيب..امبارح مر مع مرته.. لم تسعفني ذاكرتي ونسيت اسمه .. إنما أنقذتني زوجته وهي تقول له: دفعت يا ابو عصام؟..أخذت دواء للمفاصل .. اكتشفت انه ام عصام إنسانه رائعه .. صار لها ثلاث أيام بتلف على صيدليات تشتري منفحه ( مساة)اللي بتعمل الجبنه البيضاء من الحليب الطازج..هي وعدت راعيه البقر اللي ساكنه جنب بيتها تشتري لها قد ما تقدر بس تيجي عمان..مش لاكيه منها في بيت لحم وانا أحب ما علي حد يكوللي جيبي لي معاكي!!وهذاك ابو عصام قال لها: والله نصيه الجبنه اللي بتهديكي إياها ما بتيجي إشي كدام التعب والشكا اللي تعبتيني اياه باللف والدوران عالمنفحه تاعتها!! ام عصام ذكيه .. طنشته وعملت حالها مش سامعه ! إشتريت لها ٣٠ كرص يا ام حكم.. دوبهن يكفوها للخمسميه راس غنم وبقر!! وهنا احتدم النقاش بين ام عصام وأبو عصام واختلفوا على العدد فهو يجزم بشكل قطعي ان العدد لا يتجاوز الأربعمائة راس!! ولويش سحب الأفلام ؟؟ كالت له قصدي قالت له: ما هو يا ابو عصام مش بكراتها وغنماتها لحالها ! هذا لأولادها كمان! الحمد لله اقتنع الرجل وحل السلام والوئام بين الزوجين الرائعين..حبه المنفحه الواحده بتعمل كميه مهوله من الجبنه البيضاء اللي راعيه البقر والغنم وأولادها بيسترزقوا منهم..وإذا انقطعت المنفحة من البلد إعرفوا انه السبب هو أبو عصام وأم عصام وجارتهم وبكراتها!!( من يوميات صيدلانيه).

اليوم المساء، دخلت الصيدليه ست كبيره ، منقبه ولابسه اسود ومستنده عالعكازه..بدها دواء الضغط تبعها..شو أسمه؟ما بأعرف !..محلي ولا أجنبي؟ما بأعرف! طب بتتذكري كم ثمنه؟ ما بتذكر..!!بس هو لونه أزرق ومحطوط بمرطبان!يمكن يكون دواء الغده!!..والله يا خالتي انت ما عم بتساعديني بالمره!وهذا الحكي ما بيزبط!لازم تجيبي العلبه الفاضيه!..بس أنا ما بقي معي ولا حبه ولازم أخذه قبل ما أنام !والعلبه قطيتها!(وهذه الكلمه بعد استشاره خبير لغوي كان متواجدا تعني :كبيتها بالزباله!)..وليش قطيتيها يا خالتي؟( وقد بدأ صبري بالنفاذ!).. انا داري ! هذا اللي صار! خليني أشوف الأدوية يا ميمتي! بس اشوفه بأعرفه!!عن جد .. بس لحظتها.. ولحظتها فقط .. اعترفت بيني وبين نفسي انه بالي طويل!..وطلعت شريط دواء من شنطتها وسألتني:شو هذا؟ قلت لها: هذا دواء لنقص الغده.. ها! يبقى اللي بدي اياه دواء الضغط!! اشوف الرفوف!! هذا مش هذا.. هذا مش هذا.. قعدنا على هالحاله عشر دقايق..وهي مصره! بس أشوفه بأعرفه!وبالاخر ورجيتها دواء للضغط لونه اخضر وبمرطبان!قالت :هو هذا! بس هذا مش ازرق يا خالتي هذا اخضر!هو هو أكيد! ورجيني الحبه!خاطرت وفتحته وانا حاطه إيدي على قلبي!وشافت الحبه اللي هي خضراء كمان!قالت هو بالضبط هذا!! هوووو بنفسه انا متأكده! قلت لها الحمد لله وجدنا الضاله المنشودة..بس المره الجاي قولي بدي الدواء اللي زي دواء حماة ام حكم..! حماتي بتاخد نفس الدواء.. ولو انا ما كنت بالصيدليه خليهم يحكوا معي وانا اقولهم شو دوائك!..واسمحي لي أقولك انا أعجبني فيك إصرارك وعدم يأسك! حبيتك يا خالتي! صارت تضحك وطبعا ما شفت ضحكتها بس سمعتها لانها زي ما قلت بالأول كانت منقبه..وقالت لي وهي طالعه : سلمي لي على حماتك!(من يوميات صيدلانيه)..

عالصبح، ست كبيره جاي تصرف وصفه فيها دواء اكتئاب لشاب عمره ٢٠سنه..!!وبتسألني قلقانه، خايفه يتعود عليه، اذا تشتريه ولا لأ؟؟..يعني في ناس بيغلبوا حالهم وبيروحوا عالدكتور وبيدفعوا مبلغ وقدره وما بيحكوا اشي للدكتور بعدين بيجوا عنا عشان يأخذوا موافقتنا على الدواء!شو هالثقه! اشي بيحسس الواحد بقمة المسؤوليه!!..المهم، سألتها شو القصه بالضبط؟ لازم افهم حيثيات وأبعاد الحاله حتى أدلي برأيي المتواضع...طلع الشاب مش ابنها وهم مستضيفينه بالبيت لانه عم بيعمل عمليات في عينه ..عينه تصاوبت نتيجه شظيه من لغم انفجر لما دعس عليه ابوه بالغلط وهم في سوريا.!!! الشاب شاف ابوه قدامه عم يتقطع أشلاء !! وبعدين أقولها ما يأخذ دواء اكتئاب!! طبعاً يأخذه ويأخذه .. ويأخذه كمان!!قلت لها : هو هلق في عمر خطير، وإذا تركتوه من غير علاج نفسي ممكن يروح فيها بجلطه قاضيه لا سمح الله!!!..وما تخافي يتعود عالدواء ، بس يتحسن بيصير يخفف منه تدريجيا...الملاحظة التي تستحق الذكر ، ان هذه الست عندها خمس شباب وثلاث صبايا بالبيت اللي يادوب واسعهم !!ومع هيك استقبلوا الشاب في بيتهم..ما له حد بهالبلد يا ام حكم !.. للعلم الست أردنية نشميه.. وكانوا يعرفوا أهله بالزمانات..بدها الاجر من عند الله!! شو احترمتها هالبني آدمه !! زي ما بيقولوا شباب هالايام : على راسي والله! (من يوميات صيدلانيه)..

اعترف اني مشكلجيه وما اعرف اسكت اوقات .. وشكله لازم أغير اسم يومياتي الى( اعترافات صيدلانيه)...!!.. الموضوع انه إحنا الصيادله منشوف وصفات أشكال ألوان.. ولما نشوف اشي ما بيعجبنا ، لا نذم بالطبيب ولكن ننصح بأخذ رأي طبيب آخر قبل الشروع بأخذ الدواء!!..وهذا اللي عملته مع مريضه عندي من زمان.. كان رأسها بيوجعها ورايحه جاي تقيس بضغطها وما عندها ضغط! لما نصحتها تشوف دكتور أعصاب سمعت الكلام .. وأجى زوجها يصرف الوصفه وهي بتستناه بالسياره.. اول ما شفت الوصفه ! بحلقت ! ثم بلعت ريقي ! ثم إزبهليت ! ( والإزبهلال هي كلمه لا اعرف اصلها ولا فصلها ولكن أحس أنها تعبر عن أقصى حالات الاندهاش!).. إذ كانت الادويه هي عباره عن مزيج من ادويه الصرع! .. هو سؤال واحد سألته للزوج : الدكتور عمل لها تخطيط دماغ؟ .. قال لي : أبدا ! فحصها عادي وكتب هالادويه.. مالها اشي الادويه؟ قلت له وبراءه الأطفال في عيني! هاها: لا لا.. بس انا حابه تعرضها على دكتور تاني يعملها تخطيط دماغ قبل ما تبدأ بهذا العلاج.. والله والرجل والحمد لله سمع الكلام .. وبعد أسبوع من هذا الموقف مر علي وقال لي : بعد الفحوصات المكثفة طلع عندها ورم سرطاني في دماغها ورح يعملولها العمليه بأسرع وقت !! وعملتها والحمد لله وامورها تمام .. هي القصه قديمه بس أبدا ما أنساها لانها دليل حي على انه الواحد اذا في اشي ما أعجبه ما يسكت !( من يوميات صيدلانيه)

تدهش أحيانا من الصراحه المطلقة اللي ممكن يقولها الانسان لحد غريب مثل صيدلي او طبيب .. اللي مع الأيام صار يعرف كل مشاكلك الصحيه اكتر من اقرب المقربين منك.. قبل العيد مرت علينا زبونه اعصابها تعبانه ومتزاعله مع زوجها وطالع نايم بره البيت!. أخذت دوائها الضغط وقعدت تحكي وتشكي..عاجلتها عشان نختصر لانه في ناس ما بينعطوا لا عين ولا إجر ! وانا ما بيهمني تفاصيل المشكله!بدها نصيحتي..وانا بطبيعتي لا أنحاز لجانب من غير ما اسمع للجانب الآخر.. والله يرحمك يا أبي كان يقول:it takes two to tango! يعني بالعربي : إيد واحده ما بتزقف!..إلا يكون الحق عالاثنين بشكل عام وكل واحد بده يقدم تنازل منطقي حتى المركب يضل ماشي !.. هي رأسها وألف سيف يعني مصممه أهلها وأهله يتدخلوا ويحلوا المشكله اللي هي كانت خلافات ماليه على طولة لسان!.. قلت لها : شوفي حبيبتي ! لا أهلك ولا أهله! انت مش عندك أولاد بالجامعه؟؟ يعني كبار! وجيل هالايام قد ما منحكي عنه الا انه واعي وقد حاله وبيطلع منه! بتقولي لاولادك هم اللي يصلحوك على زوجك ويرجعوه البيت لانه هم اكتر ناس بيهمهم عالبيت ما ينخرب!.. بعد العيد حكت معي .. وقالت لي عملت بنصيحتك والأولاد رجعونا لبعض! وتوته توته خلصت الحدوته!(من يوميات صيدلانيه)

رائع زين ! ٩٤! شو بدك تدخلي بالجامعه؟ رسي المزاد على هندسه مياه وبيئه بالجامعه الألمانية..وبدأت رحله الخمس سنوات.. ايمتى دوامك؟ رني علي بس تخلصي!..بدي ادرس عند صاحبتي! تعالوا خدوني! بكره امتحان .. ما حدا يحكي معي! الماده صعبه! الدكتور بيحكي طلاسم! موبايلي كان خالص شحنه! سكر الباب وراك ! لو سمحت وطي صوت الأغاني بدي ادرس!!! وين الفلاش ميموري؟؟..مين شاف الأوراق اللي كانوا عالطاوله!؟حبيبتي ماما صحيني بكير ! ضبطت الفيزا ! رايحه على ألمانيا..!! احكيني سكايب! تخافوش علي صرت كبيره! وينك؟ بالقطار على إيطاليا ! ماما كتير حلوه فرنسا! تروحيش لحالك؟ تعالوا عندي ! لازم تشوفوا النمسا!!..احلى أسبوع في حياتي أمضيته في أوروبا تحت وصايه ابنتي! عم أصوم يا ماما بس بيأذن المغرب عالعشره!! حبيبي بابا حولت لي فلووووس!! ؟؟؟مشروع التخرج ! مش ملحقه! أعطوني السياره عندي موعد مع دكتورتي! وينك؟ تتأخريش!!..مناقشه مشروع التخرج ! والله وابنتي بتعرف تحكي! لبست روب التخرج ! قاعده عالمنصه ! هيها هناااك!! زين حسام الماجد ! مبروك يا ابو حكم ! مبروك يا ام حكم ! ( خساره حكم مسافر مش معنا بس مع هيك كان معنا بروحه الحلوه) .. والله وأجى هذا اليوم ..بسرعه زي الحلم .. غمض عين وفتح عين ! لسه هديك اليوم قال لي الدكتور : مبروك ! شو بدك تسميها ؟؟؟؟ 

في ناس ممكن يمروا في حياتك ساعه زمان ويختفوا،بس ما بيختفوا من ذاكرتك..نموذج رائع وكتله من الرضى كانت قاعده جنبي في الطياره بآخر رحله..ولو انه ما تراه حقاً هو كتله من الشحوم ..!! كلمه هون وكلمه هون حكت لي قصه حياتها..بالأول قالت أنها الجده وانه اللي معاها حفيدها.. وعمرها ٦٣، بس فجأة طلعت هويتها عشان اشوف عمرها الحقيقي ٤٨ ! وهي ما بتقوله لحد عمرها لانها بدها تكبر حالها! .. ممشيه عالكل أنها كبيره لانها من خمس سنين تزوجت واحد عمره بالتسعين..وهذا حفيد زوجها اللي أصر يجيبها على مرمريس .! اول مره بتركب طياره ...!!زوجها مرض ولما قالت لأولاده نجيب ممرض قالوا لها: واحنا ليش زوجناكي اياه! .. خدمته بكل ود ومحبه.. وبتقول الخمس سنين اللي امضتهم معه كانوا احلى سنين حياتها لانه حفظها القران وسجل البيت باسمها..كانت احن عليه من أولاده وزوجاتهم وأحفاده ..شافتهم داخلين طالعين قبل ما يموت بيوقعوه على أوراق بس ما فرق معها المهم يتركوها بالبيت لانه ما لها حد .!!. عايشه هلق في منتهى السعاده من معاشه ٣٠٠دينار وبتشيل ٥٠د كل شهر كفاله يتيم ! وبتعزم كل العيله الجمعه لانهم صاروا أهلها .. دارسه بس للصف الخامس وبتلهي حالها بشغل الصوف .. ما بتختلط بجاراتها لانهم بيحكوا كتير ! بس هي ارتاحت لي على طول عشان هيك فضفضت لي .. قصه حياتها أبهرتني وحسيت حالي قاعده جنب واحده من أهل الجنه..منتهى القناعه والرضى..حكت طبعا عن أمراضها الكتيره وكيف شايله الرحم من زمان وبطلت تاخذ ادويه لانها زهقت منها..!! نموذج ما مر علي ولسه ياما الواحد رح يشوف !! الله يشفيها ويعافيها وييسر أمرها.. (من يوميات صيدلانيه)..

من كم يوم شفت صديقه لي .. قالت لي: وانا ايمتى بدك تكتبي عني؟- وليش اكتب عنك؟-لانك عملت معي معروف من كم سنه!!-أوووه! بأحب المعروف اللي أنساه ! وانا شو كاينه عامله معك؟-ما وافقت تصرفي لي الدواء! -له له له ! شووو هالحكي ! هذا معروف؟ليش حضرتي عملت هيك؟-هذا يا ستي جبت لك وصفه من دكتور نفسي كاتب لي دواء قال لي انه مهدئ أعصاب!بس لما انت شفت الدواء قلت لي هذا دواء اكتئاب رسمي!وانت مااااا عندك اكتئاب ! عندك شويه مشاكل روحي حليها وما تفكري الدواء رح يحللك إياها !-آه رجعت لي ذاكرتي!ضيعت على حالي وقتها بيعه دواء محرز!وقلت لك بلاش تبلشي بهيك ادويه وكل مشكلتك انك تغيري شغلك!-مضبوط! طلعت من عندك وقتها وما رحت اشتريته من صيدليه تانيه..وفكرت انه معك حق لما ذكرتيني انه المؤمن لا يكتئب أبدا .. أمره كله خير ، ان سراء شكر وإن ضراء صبر.. بس بدك الصراحه انا مشاكلي زادت ومن كل النواحي وما لقيت قدامي غير آيه( ففروا الى الله) وأقبلت على سجاده الصلاه..حتى الله فرجها معي والحمد لله.. اكتبي عني وقولي للناس اني احمد الله على الابتلاء اللي رجعني لله..( من يوميات صيدلانيه).

شو بده يقول الواحد ! انا الحالات شايفتها قدام عيوني! لما يقولوا لكم: اول ما تلعب الفلوس بإيد الرجل بيتزوج على مرته، في ومنه هالحكي!! هلق إحنا مش مختلفين ! أصابيع ايديك مش كلها زي بعض! واللي على راسه بطحه!! كل واحد أدرى بحاله!! صاحبنا ، قصدي اللي كااان صاحبنا ، زبوني من زمان بس نقل من المنطقه بعد ما توفى والده وورث منه مبلغ وقدره.. رن علي يسألني عن دواء لمرته تعبانه ومريضه.. قلت له سلامتها فلانه ولا هو بيفاجأني يقول لي : لا مش هي اللي مريضه، مرتي التانيه! انا تزوجت!!.... مرته التانيه؟؟؟ منيح اللي أعطاني هالخبر عالتلفون فما شاف حواجبي كيف طلعوا مترين لفوق!!!...هذا العريس قرب عالستين وأولاده بالجامعه.. وعروسته عمرها ٣٦ وبدهم يعملوها قسطره لانها بتدخن ٤باكيتات دخان باليوم .. اللهم لا شماته! بس خرجه!! أهم اشي انه رن علي وزوجي جنبي وأول ما خلصت المكالمه،قلت لزوجي: ها ! شفت شو بيصير فيه اللي بيتزوج على مرته!!! إلا يأكل مقلب ويوقع على راسه!! تعلموا من اللي بيصير مع غيركم! الله يهديكم ويعمي على نظركم ما تلاقوا حدا حلو غير زوجاتكم!! هاها..( من يوميات صيدلانيه)..

سألت هذا السؤال من زميله صيدلانيه.. فكرك ليش البيع نازل هالاياااااام؟؟؟ اممم .. بصفه اني محلله اقتصاديه على طريقه ابو محجوب (هاها).. قلت لها: بالعقل! فكري فيها شوي.. الناس انبلشوا بالأكل في رمضان وبعدين ما قدروا يهربوا من ملابس العيد ..بعدين قبل ما يأخذوا نفس إجتهم المدارس وقصص المدارس حدث ولا حرج.. وفجأة وإذ به عيد الأضحى!..بنص الشهر وما نزلوا الرواتب! يعني باختصار أكلوا هوا.. لانه الفلوس هي هي..والسماء لا تمطر نقودا يا ولدي..! بيحرموا حالهم من دواءهم مقابل توفير احتياجات زوجاتهم وأولادهم..الله يكون بعون الناس! وحده زبونه عندي عليها حساب ( أه أداين!)دوائها النفسي اللي بتاخده كل شهر..وما اقدر امنعه عنها ( بضل اقول إحنا مش محل نوفوتيه!)..قالت لي ادفع لك من عيديات إخواني ان شاء الله .. اجى العيد وراح العيد.. واتصلت تعتذر: ما عيدوني إخواني يا ام حكم ! بس انا باعثه لك مبلغ بسيط يخفف الحساب من مصروف الأولاد..زوجها مغترب وكل فتره بيبعث حواله.. وحده زي هاي كيف بديش اصبر عليها؟؟ علها تشهد لي يوم القيامه ( وان كان ذو عسره فنظره الى ميسره)٢٨٠سوره البقره. ( من يوميات صيدلانيه)..

ظروف الحياه الصعبه أدت إلى ان الواحد يفكر عشر مرات قبل ما يعمل معروف مع حدا!! للأسف صار الواحد بيشاور عقله يعمل الصح ولا بلاش توقع على راسه! هذا ما حدث مع شباب الباص الخاص بمستودع ادويه النابلسي .. بعد ما نزلوا الطلبيه وإذ بأحدهم يرى محفظه مرميه على باب الصيدليه من بره..طبعا الكل عارف شو معنى هالحكي .. اتهام مباشر للشخص اللي لقي المحفظه وخاصه إذا كان فيها مبلغ محرز مسروق!! وبعد التشاور السريع بين الشباب اللي كلهم خير ، دخل واحد فيهم يعطيني المحفظه.. لما فتحتها وشفت هويه صاحبها..عرفته على طول! هذا العريس اللي اجى مع عروسته يأمن ادويه أبوه قبل العرس والسفر! ومن اللخمه واقعه منه المحفظه! مش هون القصه! رنيت عليه على طول: هيك يا محمد بتوقع محفظتك على باب الصيدليه!! قال لي: وال٥٠٠دينار فيها!! قلت له: شو فلوس ما فلوس! فاضيه بس الهوية! الشب على قد حاله وأكيد مدير الفلوس تدبير!! الحمد لله لحقت خطيبته قالت له أنها أخذت الفلوس من المحفظه ومعها بالشنطه قبل ما تيجيه جلطه على هالخبريه! موقف كان مضحك على مبكي! المهم قلت له هي المحفظه في الصيدليه تعال خذها .. ولما مر مندوب المستودع المذكور، كتبت كتاب تقدير لشباب النقل لعدم ترددهم في القيام بالواجب الطبيعي في زمن اختلطت فيه الأمور واختلفت المفاهيم.. وصار الطبيعي مستهجن ومستغرب وفعله يستحق التقدير..( من يوميات صيدلانيه)..

أفرح كثيراً عندما يدخل الصيدليه حدا تائه وبيسأل على عنوان بالمنطقة !عن جد ! لو تعرفوا قديش أفرح! أحس كإنه الله بده يعطيني حسنه! وأخذ الموضوع بمنتهى الجديه وأدل الشخص بكل إمكانياتي..وإذا بده تلفون منرن عالجماعه..وأطلع معه بره وأدله عالمكان بكل أنواع الشرح الصوتي والمرئي.. ولو قدرت أوصلهم مش رح أقول لأ.. ولو انه الاحتياط واجب..ومع هيك مره عملتها!! إثنين ختياريه بدهم يروحوا يشتروا من الصيدليه اللي خلف صيدليتي .. ولما شفت صدمتهم لما اكتشفوا انه هذه مش الصيدليه اللي فيها التأمين تبعهم وانه لسه رح يمشوا عشر دقايق والتكسي كان صار رايح وهم ما فيهم حيل !! لما شفت هيك لم أتمالك نفسي ( والسياره كانت معي يومها والصيدلانيه مداومه) الا وقد قلت لهم : أوصلكم عمي! تفضلوا! حسيتهم زي المقطوعين بنص الصحراء وانا القافله اللي شافوها رح تنقذهم من على بعد!! استمتع قمه الاستمتاع وأفرح أشد الفرح ولا اعتبر هذه حسنه قليله ..قد تكون كبيره عند الله ..ما حد عارف ، عند الحساب بدنا أي إشي حتى لو كانت انه ندل شخص تائه في المنطقه !!!(من يوميات صيدلانيه)..

مقوله ( اذا عرف السبب،بطل العجب) صحيحه تماماً..زبونه أجت اليوم تستشيرني في دواء الضغط الخص بها واللي لسه طبيبها ضايف عليه كمان دواء لعدم استقرار ضغطها..بعد شوية أخذ وعطاء ، واستجواب واستنطاق..وممكن تكون الحاله مؤقته و.. ضغطك مش كتير عالي ..تفاجأت وهي تحدثني أن ممكن يكون السبب وراء ارتفاع ضغطها هو ... إصابتها بالفرح !!! ابنتها اجت الموافقه على جوازها السفر الأجنبي !! يااااا للهوووول!! من كتر أسباب رفع الضغط السيئه من ضغوط الحياه وسمات البدن المتنوعة .. نسيت انه ممكن ان يصاب الانسان بنوبه عارمه من الفرح تؤدي الى رفع ضغطه !!! كيف غاب عن بالي ؟؟ أو قد بلغ بي الأمر هذا المبلغ ؟؟ أن الفرح اصبح حاله نادره لدرجه انه لم يخطر على بالي !! ويمكن الناس صارت لما تفرح ، تخبئ فرحها خوفا من الحسد..!!.. المهم طمنت الست انه فرحها الزائد قصدي ضغطها الطالع مش رح يطول !! وهديت وروحت تاركتني مندهشه من نفسي اني نسيت رغم نظرتي الايجابيه للحياه كم يستطيع الفرح ان يؤثر على الانسان .. ( من يوميات صيدلانيه)

إحدى صديقاتي مرت امبارح عالصيدليه تشكو من الآلام في الأكتاف واليدين بس فرحانه!! غريب ؟ ألم وفرح!!..(ذكرتني في ساعه الولاده !).. قلت لها: ما الأمر يا أختاه؟.. قالت لي أنها عم بتجدد في مطبخها وقررت تعطي فرن الغاز والثلاجه لعائله فقيره تفرحهم قبل العيد.. ولكنها تفاجأت بالفرن وقد كثرت عليه بقع الزيت من الأطراف التي كانت غير مرئيه..وصار الأبيض موشح بالألوان !! استحت تعطيه للعائلة الفقيره وهو بهذه الصوره فشمرت عن سواعدها وهات يا فرك وهات يا تنظيف حتى اصبح بيلمع لمع كأنه جديد!.. لما خلصت كانوا أكتافها وأيديها قد أصيبوا بأحلى شد عضلي !! كله حسنات بإذن الله..كل ذلك ينبع من إحساسها وفهمها الصحيح للحديث الشريف ( ان الله طيبٌ لا يقبل إلا طيباًً)..بارك الله فيها وكثر من أمثالها ..(من يوميات صيدلانيه).

مرت علي مريضه جاي من عند دكتور الأسنان .. صرفت لها الدواء وهي متألمه وبتقول أنها زارعه كم سن كل واحد مكلفها ألف دينار! دينار ينطح دينار!..وفي نفس اليوم مرت على زبونه قعدت انا اتغزل بمشيتها بعد ما تعذبت وبالآخر حطت ركب جديده! الركبه بخمس آلاف دينار!!.. روحت يومها وانا باحسب..٣٢ سن وشايله ٤ طواحين العقل.. بيطلع حفله الاسنان الباقية تقدر ب٢٨ألف دينار! والركبتين بعشره آلاف! والعين بمبلغ والكليه بمبلغ والشعر بمبلغ وكل جزء في جسمي بمبلغ!! هذا انا لو قطع تجميع كام أسوى!!؟ اتاري أنا لا اقدر بثمن!! لما اقول وزني ذهب..معي حق!!هاها..كل هذا والحمد لله طبيعي في طبيعي!ومن غير ألم ولا مستشفيات ولا تخدير ولا ادويه!! ياااااالله انت شو كريم يا الله! سبحانك ما عبدناك حق عبادتك .. إحنا قديش مش مقدرين النعم اللي إحنا فيها!! قد ما تقولوا حاسيين ، هذا ولا إشي! بيضلهم يقولوا الصحه تاج على رؤوس الأصحاء لا يراه الا المرضى.. لكن انا احب ان أضيف:اللي يراه أيضاً الصيادله والزملاء في المهن الطبيه .!!! .. وشويه ناس كمان عندهم نظر ثاقب!! ( من يوميات صيدلانيه)

الصيدليات اللي باتعامل معها في نفس المنطقه تضرب مثل في قمه التعاون..تمثل ذلك لما مر عليّ زبون بده ٥ قطع من دواء كان متوفر عندي منه ٤ فقط. والمستودعات مغلقه والزبون مسافر في نفس اليوم .. مما اضطرني الى اللجوء لصديق .. ونعم الصديقة هي صيدليه ليالي، د. Hawazen Abukhait ،حيث رغم ان الدواء مش عندها ، ما حبت تروح علي البيعه، حكت مع ص. فزع ، بدوره د. عدلي ما كان عنده الدواء الا انه دبر لي اياه من صيدليه ربوع الدواء اللي انا ما باعرفها حتى... صحيح انا فرحت عالبيعه التي تمت بنجاح إلا ان فرحتي بزملائي المتعاونين كانت أكبر..ومع ان سياستي العامه عدم ذكر أسماء معينه في يومياتي الا انه في حاله الشكر اقتضى ذلك..ومن لا يشكر الناس لا يشكر الله.. الفكره اللي حابه أقولها انه هالصيادله أشخاص في المجتمع ، وليش ما يكون المجتمع كله هيك ؟؟، ما في حقد ولا ضغينة ولا حسد .. ونتعامل بالمحبه والتعاون والإيثار..والرزقه مكتوبه وجااااي جاي..!! واحنا رح نتحاسب كيف جبناها وشو عملنا فيها ووين صرفناها..والله يعينا .. ( من يوميات صيدلانيه)..

واحد من المرضى لما دخل الصيدليه من كم يوم ما صدقت حالي! زي كيف اللي شايف حد المفروض انه في عداد المحتضرين ! طبعا انا متابعه الحاله مع زوجته من طقطق لسلامو عليكم .. كيف كان بالعناية المركزه والدكاتره قالوا لأهله روحوه يموت في بيته! وأهله فتحوا مستشفى في غرفته تحت إشراف ثلاث ممرضين على مدار٢٤ساعه!ومرته تيجي والدمع محبوس في عيونها واحنا نصبر فيها! أصلا إحنا كان لازم أعطونا كورس علم نفس ضمن مواد الصيدله بس هي خبره الحياه اللي اعطتنا دكتوراه فخريه في علم النفس من غير كرتونه ولا تخريج ولا كنافه تواصي! المهم ذهلت برؤيته فسبحان الذي يحيي العظام وهي رميم فلن يعجز عن شفاء بني ادم لم يحن اجله بعد..والمضحك في الموضوع انه الوصفه اللي جاي يصرفها لدواء هو لعلاج حب الشباااااب!! فلم أتمالك نفسي وقلت له: شو !! عم بتراهق على كبر يا جورج !!؟؟؟هاها..( من يوميات صيدلانيه )..